قصيده كتبت نداء لقبيلة اعنزه ونخوه بهم
وذكر فيها هذه الفخوووذ من قبيلة عنزه
( الحبلان _ الصقور _ الصليلات _ ذوايده _ رويل _ الفدعان _ السبعه )
وعلى رأسهم الشيخ مسلط الهذال
وذكر فيها الدهامشه
بديت بسم الله ثقيل الموازين ** المعتلي رفاع سبع السموات
يالله ياقابل صلاة المصلــــين ** تفكنا من كل حاسد وشمـات
من بعد ذكر الله نخيت الوفين ** اللي لهم في موقف الطيب عادات
انخاك يانسل الشيوخ القديمين ** اهل الحميه بالسنين القديمات
يامسلط الهذال نسل السلاطين ** ننخاك يارمز الشرف والمروات
مادمت حي تشوفنا شوف بالعين ** ننخاك مانشره على الناس الاموات
ياخلفة اللي يلحقون المخلين ** أمالنا تاقف عليك انت بالذات
انخاك والعله بوسط الشرايين ** وين اخو بتله والمراجل صعيبات
انخاك واشكيلك من الغبن والبين ** وابشرك ماهي علومٍ رديات
كم واحدن قبلي **ر ظهره الدين ** شيوخ صابتهم من الدين لوعات
ياولاد وايل وينكم عننا وين ** نخيتكم يالابتي بعالي الاصوات
قلبي يسج الصوت بين الشرايين ** ويقول يافلان وين العمارات
يقول ماظني عن الوضع دارين ** ولهم دروا خففت عنك المعانات
قلت اشرح الواقع لهم بالبراهين ** انكان باقن بالاجاويد شيمات
دهامشه وهموم قلبي براكين ** ياللي تشيلون الحمول الثقيلات
نخيكتم ترى الفرج غاب قوسين ** الله يفرج عنكم كل كربات
انتم محددة الجمل بالاكاوين ** ياما حوى تاريخكم من بطولات
نشكي على الحبلان ريف الضعيفين ** ياعز من جاله من الوقت ويلات
نخيتكم يامطلقين المساجين ** والطيب مابين الرجال انتصارات
دايم على **ب الفخر مستعدين ** يفداكم العزى ويفداكم اللات
وانخي الصقور ليا غدى الراي رايين ** للي لهم عند المواجيب هدات
هدات عزن يفتحن الحجاجين ** على الفخر مثل السباع المجيعات
وانخي الرجال اللي على الطيب جسرين ** لاضاقت الدنيا نخيت الصليلات
لامن دعاهم داعين جوك عجلين ** مثل الفوارس في نهار المثارات
نعم بهم بالوقت الاول وهالحين ** ماغيرتهم زايفات الحضارات
وانخي الذي معهم لشكواي تثمين ** ذوايده عن الامور العظيمات
كيف اشتكي وانتم على الكون حيين ** ضيفوا على صفحات الامجاد صفحات
يسجل التاريخ بالزين والشين ** وانت لكم في صفحة العز بصمات
وانخي هلا العليا على العسر واللين ** رويل لا طالت علينا المسافات
حماية العطفه نهار اللقا الشين ** لاجن جراديس السبايا مغيرات
لي حق بالدنيا ولي حق بالدين ** منكم وفيكم يارجال الحميات
وانتم لكم في حلة الوضع تمكين ** نلجا على الاجناب عيب وملامات
واقول للفدعان وين المسمين ** نطاحت الماجوب في كل الاوقات
نخيتكم وانتم على القلب غالين ** وفيكم على **ب النواميس همات
ياهل الحميه في جميع الميادين ** للطيب يوم والزمان انعكاسات
وانخي السبعة الابة الربع الادنين ** ياذخرنا عند الامور العسيرات
عشتوا على درب المعزه عزيزين ** ونلتوا فخركم بالسيوف الرهيفات
لامن دعا الداعي وقفتوا ملبين ** مثل الحجيج اللي بقمة عرفات
نخيكتم وانتم لما اقول مصغين ** يحفظكم الله من جميع المصيبات
بكره الخبر ينشر بكل الدواوين ** الفعل يبقى له براهين واثبات
اذا رفعتوا روسنا يالميامين ** نرفع لكم في روس الاجبال رايات
الأحد أغسطس 03, 2008 1:31 pm
